مشرووم بالبطاط >>>لايطووفكم

السلام عليكم

شلوونكم بنوتات

هالطبق لذييييذ، سويته عالسريع لما زارتني صديقتي والحمدلله توفقت فيه

المقادير:
- مشروم طازج أنواع (تحصلون أنواع مختلفة بمركز سلطان، وضروري يكون طاازج ومنوع.. لأن الطعم يصير أحلى)
- بصلة وسط مقطعه مكعبات صغيرة و3 فصوص ثوم مفروم.
- بطاط مقطع شرايح رقيقة نوعاً ما يعني مو واااااايد رقيقة ولا متينه، عشان تستوي بسرعة بالفرن.
- كريمة كي دي دي
- جبن بارميزان مبشور
- جبن موزاريلا مبشور
- مكعب ماجي+ فلفل أسود+ ملح
- أعشاب عطرية، اللي عندكم زعتر فرش أو أوريغانو.
- جرجير
- صلصة نحطها عالويه قبل التقديم عبارة عن: صلصة ويشبون رومانو باسيل قفشتين أو 3 + خل البلسمك ماركة MF قفشتين كبار+ فصة ثوم مهروسه+ رشة سكر وملح. (كمية الصلصة حسب حجم الطبق عندكم)

الطريقة:
- نحمس البصل مع الثوم ومكعب ماجي بشوية زيت نباتي مع زبدة لما يتحمر البصل نضيف عليه المشروم ونقلبه عالنار لما ينحمس عدل، ونضيف عليه رشة ملح وفلفل أسود. والأعشاب العطرية

نتبل البطاط بالفلفل الأسود والملح ونحط طبقة بالبايركس ونصب عليه شوية كريمة

نحط حمسة المشروم على البطاط ونغطيها بطبقة خفيفة من جبن البارميزان المبشور.

بعدها نرجع نحط بطاط متبل بالفلفل الأسود والملح ونحط عليه شوية كريمة وبعدين جبن موزاريلا وبعدين نحط باقي الكريمة لما يتخلل الطبقات كلها ونغطي الطبق بقصدير وندخله الفرن نفتح النار من تحت ونخليه مدة نص ساعة تقريبا ولازم تطلون عليه تشوفون اذا الكريمة تشربت الطبقات وتماسكت نوعاَ ما، بعدين نشيل القصدير ونفتح النار فوق عشان يذوب الجبن.

وجذي شكل الطبق بعد مايستوي

مشرووم بالبطاط >>>لايطووفكم Thumb-7-2009-859edxfy

يعطيج العافيه على الطبخه
وانشالله اجربها